Sniðugir Þjóðverjar

Þjóðverjar eru ansi sniðugir á ýmsum sviðum. Þeir elska ekkert meir en reglur og skipulag (eins og kom svo glögglega í ljós í skilvirkni vinnubúða seinni heimsstyrjaldar), og við Íslendingar gætum lært margt af þeim.

Það fyrsta sem ég vil nefna er breytilegur hámarkshraði á þjóðvegum. Á Íslandi er hámarkshraðinn allsstaðar 90, og á stöku stað lægri. Á Íslandi virðir enginn hámarkshraðann nema í undantekningartilfellum. Í Þýskalandi miðast lögbundinn hámarkshraði við aðstæður. Þannig er hann stundum 80 á buðgóttum sveitavegum, en skömmu seinna kannski 110, og jafnvel 130 þar sem aðstæður leyfa. Mesta snilldin þótti mér þó breytilegur hámarkshraði eftir akreinum. Þannig var hann á einum vegi sem við ókum eftir 130 á vinstri akrein en 100 við hliðina. Takmörkin voru gefin til kynna á rafrænum skiltum yfir akreinunum, og þannig væntanlega hægt að breyta þeim eftir aðstæðum, t.d. ef að hann skylli á með hríðarkófi.

Þetta fyrirkomulag væri fullkomið á Reykjanesbrautinni. Ég keyrði hana daglega í heilt ár, og ef ég keyrði ekki á 120 var ég bara fyrir. Oftar en ekki brunuðu langar bílalestir á 140. Breytilegur hámarkshraði er eitthvað sem við Íslendingar ættum að taka upp undir eins.

Annað sem Þjóðverjar gera afar vel eru almenningssamgöngur. Þær eru traustar og skilvirkar. Sporvagnar ganga t.d. hratt og örugglega um Freiburg og menga ekki með útblæstri. Ég er ekki að segja að Íslendingar ættu endilega að taka upp sporvagnakerfi, en þeir ættu að taka upp sama miðakerfi og Þjóðverjar. Þar kaupir maður miðann úr sjálfsala um borð, og miðinn gildir í sólarhring! Sólarhringsmiðar væru stórstíg framför frá klukkutímaskiptimiðunum sem við Íslendingar notumst við í dag.

Þriðja atriðið sem ég vil nefna er gosdrykkur, nánar tiltekið drykkurinn Mezzo Mix. Flestir kannast við að hafa blandað saman kóki og appelsíni, og líkað vel. Í Mezzo Mixinu er BÚIÐ að blanda drykkjunum saman, svo að útkoman er afar frískandi kóladrykkur. Svona drykk í búðir á Íslandi strax í dag takk fyrir!

Þýskalandsferðin var sumsé í alla staði afar ánægjuleg. Hitinn var að vísu frekar mikill, en við vorum á vel loftkældu hóteli. Svo mátti líka alltaf stinga sér til sunds í næsta stöðuvatn:

Þýskaland kom mér að nokkru leyti á óvart, aðallega vegna þess að ég hafði ekki hugmynd við hverju maður mátti búast, bæði af land og þjóð. Þrjú síðustu skipti sem ég hef farið erlendis hefur það verið til túristasólarstranda, sem eru töluvert öðruvísi staðir en SV-Þýskaland. Mér þóttu furðufáir tala ensku (svona er það þegar ALLT sjónvarpsefni er döbbað), Graham vildi meina að það væri vegna þess að Þjóðverjar vildu ekki gera neitt nema að þeir gætu gert það fullkomlega. Þ.a.l. sleppti fólk því bara að tala ensku ef það hafði ekki fullkomið vald á henni.

Það sem kom mér þó mest á óvart var hversu myndarleg þýska kvenþjóðin er. Af einhverjum ástæðum hafði ég gert mér upp einhverja steríótýpíska mynd af þýskum konum í hausnum, þar sem þær voru loðnar undir höndunum og trukkalegar. Raunin er hins vegar sú að þær minna mjög á íslenskar konur, og þær eru jú þær fegurstu í heimi, eins og hefur verið marg sannað.

Ps. Fyrir þá sem vilja skoða myndir úr ferðinni er þær á síðunni hennar Emilíu: http://nino.is/emiliasnaeros

Stóra hómópathíusvindlið

Þar til tiltölulega nýlega hafði ég ekki minnsta grun um hvað nákvæmlega fólst í hómópathíu, eða smáskammtalækningum eins og þetta heitir á íslensku. Raunar hélt ég alltaf að þetta væri einhverskonar grasalækningar, og væru eflaust gagnlegar fyrir einhverja, og lét ég þetta mig litlu skipta. En svo komst ég að því að smáskammtalækningar eru sennilega mesta svindl sem fundið hefur verið upp!

Smáskammtalækningar eru ekki grasalækningar, langt í frá. Smáskammtalækningar snúast um að lækna líkt með líku, en bara í smáum skömmtun. Raunar svo smáum að hlutföllin eru fáránleg. Horfum á þetta kynningarmyndband með hinum mæta fræðimanni Richard Dawkins, okkur til uppfræðslu og yndisauka.

Þar hafið þið það. Hlutföllin eru svo fáránleg að “lyfin” eru ekkert annað en vatn! Og þetta borgar fólk fyrir! Smáskammtalækningar hafa blessunarlega ekki náð mikilli fótfestu á Íslandi, en í Bandaríkjunum og Bretlandi er þetta bisness sem veltir milljörðum. Í Bandaríkjun eru menn svo farnir að teygja svindlið enn lengra, með því að merkja t.d. kvefmeðul, með orðunum “Homeopathic remedy” þrátt fyrir að innihaldið sé eins langt frá því að vera útþynntur smáskammtur og hugsast getur. En bara með því að skella hómópathíu á merkimiðann, er hægt að rukka 70% meira en fyrir sambærilegt “alvöru” lyf! Þetta er auðvitað ekkert annað en vörusvik, en fyrir þessu fellur auðtrúafólk í hrönnum.

Smáskammtalækningar eru vatn. Einu mögulegu áhrifin eru lyfleysuáhrif, en fólk ætti að geta fengið þau án þess að eyða fúlgum fjár til þess eins að láta svindla á sér.

Að lokum skulum við horfa á þetta frábæra uppistand með Dara O’Briain þar sem hann tætir í sig hómópatha og aðra svindlara eins og næringarþerapista.

Að lokum, varist svindlara og kuklara eins og pestina. Takið öllu sem þið heyrið (líka þessum pistli) með fyrirvara. Á Íslandi er einn svindlari búinn að koma sér vel fyrir og græðir vel á því að blekkja fólk og selja því lyfleysuáhrif. Þessi einstaklingur heitir Jónína Benediktsdóttir.

Berdreyminn?

Ég geng aldrei með peninga á mér nema í einhverjum algjörum undantekningartilfellum. Ég nota alltaf kort. Á ekki einu sinni seðlaveski. En í nótt dreymdi mig að ég hefði týnt kortinu mínu en fyrir einhverja ótrúlega guðslukku var ég með 500 kall í kortaveskinu mínu sem ég gat notað til að borga í sjoppunni í MA. (Þar var Björn Magnús einnig staddur og söng hátt ‘Skál og syngja’ og ég bað hann vinsamlegast um að halda kjafti.) Þetta dreymdi mig bara rétt áður en ég vaknaði í morgun. Ég vakna og staulast inná bað, ekki enn kominn með fulla sjón í allri birtunni, og þar sem ég stend við klósettið verður mér litið á þvottavélina mér á vinstri hönd og sé í fjarska að það er hvítur og rauður miði klesstur inná glerið á vélinni. Þegar ég færði mig svo nær til að skoða miðann betur sá ég að þetta var hvað? Jú, 500 króna seðill!

Freeeeekar spúkí stöff, ég verð að spyrja James Randi út í þetta í kvöld.

Kontóristinn

Ég sór þess eið fyrir margt löngu að byrja aldrei að drekka kaffi. Mér þótti kaffi vont og það er alkunna að þeir sem á annað borð byrja að drekka kaffi lenda í vítahring koffínfíknar. Svo leið og beið, ég komst í gegnum menntaskóla án þess að byrja að drekka kaffi, og í gegnum 3 sumur af sjómennsku án þess að halla mér að kaffikönnunni. En síðan eru liðin mörg ár. Ég fór að fikta við kaffidrykkju eftir að ég byrjaði í háskólanum, en þó aldrei af neinni alvöru. Drakk bara latté eins og kettlingur, og aldrei nema einn og einn bolla.

Í haust ákvað ég svo að stíga skrefið til fulls og keypti kaffivél inn á heimilið. Keypti Senseo vél af Vidda (þar sem hann átti tvær), lagði ekki í það að kaupa vél sem hellir uppá heilar könnur, enda eins og áður sagði, linur kaffidrykkjumaður fram að þessu tímapunkti. Vélin var töluvert notuð í vetur, en þó alls ekki á hverjum degi og enn var ég nokkuð hófsamur drykkjumaður.

En nú er öldin önnur. Ég er orðinn skrifstofumaður, og á skrifstofu verður maður að drekka kaffi. Það er bara þannig. Maðurinn sem ætlaði aldrei að byrja að drekka kaffi er núna orðinn maðurinn sem hellir uppá kaffið á kaffistofunni á morgnanna! Enn finnst mér kaffi samt ekkert sérstaklega gott.

En mig langar samt alltaf í annan bolla.

Að læra af sögunni

Hverja einustu próftíð síðan ég byrjaði í háskólanámi stend ég frammi fyrir sömu stöðunni. Ég þarf að frumlesa ca 80% alls kennsluefnisins. Auðvitað næ ég svo aldrei að lesa nándar nærri allt efnið, og einkunnirnar endurspegla það sennilega. Þó þær séu reyndar með ágætum, gætu þær alveg verið betri, og það böggar mig pínu að vita það. Mórallinn yfir einkunnunum er þó takmarkaður, því eins og ég segi þá eru þær með ágætum, og með þessu móti hef ég fengið meiri frítíma, tíma til að eyða með fjölskyldunni, og tíma til að eyða í allskonar vitleysu, eins og tölvuleiki og sjónvarpsgláp, sem er auðvitað ómissandi hluti af lífi hvers manns.

Það sem pirrar mig eiginlega mest er að hverja einustu próftíð rek ég mig á það að finnast margt lesefnið (alls ekki allt) bæði áhugavert og spennandi, og finnst frekar svekkjandi að hafa ekki lesið það fyrir tímana og fengið þannig tækifæri til að ræða það við mér fróðari  menn. Hverja einustu próftíð segi ég líka við sjálfan mig: “Nei, nú gengur þetta ekki lengur, næstu önn les ég allt jafnóðum og lendi ekki í þessum vanda.” Svo er bara alltí einu aftur kominn prófatíð og ég ólesinn. Alveg óskiljanlegt.

Það er stundum sagt að sá sem læri ekki af söguni sé dæmdur til þess að endurtaka hana. Sem verðandi sagnfræðingur get ég vottað að þessi orð eru 100% sönn. Næstu önn ætla ég líka að lesa allt námsefnið jafnóðum.

Hamborgarafabrikkan, taka 2

Eins og alþjóð veit er ég mjög hrifinn af hamborgurum. Ég myndi ekki segja að þeir væru uppáhalds maturinn minn, en segi gjarnan að þeir séu uppáhalds fæðuflokkurinn minn. Ég var því alveg nokkuð spenntur þegar ég heyrði að Simmi og Jói ætluðu að opna nýjan hamborgarastað, en um leið svolítið pirraður yfir öllu hæpinu og hvað þeir fengu fáránlega mikið af fríu plöggi í gegnum 365 miðla, ekki bara í sjónvarpi, heldur líka í blöðum og útvarpi. En sem sannur hamborgaraáhugamaður lét ég það ekki á mig fá og ákvað að gera mér ferð á Hamborgarafabrikkuna við fyrsta tækifæri. Það tækifæri gekk þó ekki betur en svo að ég þurfti frá að hverfa þar sem að það var klukkutíma bið eftir borði! Síðan þá hef ég borðað hjá þeim tvisvar og jafnframt snúið mér annað (Vitabar) einu sinni sökum þess að það var fullt útúr dyrum. Vinsælir þurfa þó ekki alltaf að þýða gæði og ég reiknaði nú kannski með að eitthvað myndi draga úr vinsældum staðarins eftir að nýjabrumið væri að mestu horfið en þegar ég kom þarna í gær klukkan 2 eftir hádegi á virkum degi var engu að síður nánast fullt hús. Það er því greinilegt að Simmi og Jói eru að gera eitthvað rétt, og það er auðvitað bara frábært að það gangi vel hjá nýju fyrirtæki á þessum síðustu og verstu.

En að matnum. Í fyrra skiptið var ég alls ekki ánægður. Ég pantaði mér Mortens (sjá matseðil á heimasíðu Fabrikkunnar). Hamborgarinn var ofeldur, næstum brenndur, grænmetið takmarkað og bernaise sósan bragðdauf. Ég var samt tilbúinn að gefa þeim annan séns. Það eru margir spennandi borgarar á matseðlinum, og þjónustan er bæði hröð og góð, eitthvað sem alltof margir skyndibitastaðir mættu taka sér til fyrirmyndar.

Í þetta skiptið ákvað ég að prófa lambaborgarann, en á honum er bernaise sósa (en ekki hvað?), ostur og hvítlauksristaðir sveppir. Í stuttu máli sagt var ég mjög sáttur með þennan borgara. Í þetta skiptið fann maður virkilega gott bragð af sósunni og sveppunum, sem ég gat varla greint að væru á Mortens borgaranum. Það eina sem ég get sett útá er grænmetið sem er á öllum borgurum, kál, tómatar og rauðlaukur, en það var aðeins sýnishorn af grænmeti á borgaranum. Ein tómatsneið og ca eitt gramm af rauðlauk. Svona stórir borgar kalla á að minnsta kosti þrjár tómatsneiðar, og eins og eina skífu af lauk (sem er btw sennilega ódýrasta grænmetið á markaðnum). Í fyrri heimsókn minni spurði Simmi mig hvernig hefði smakkast og ég benti honum að sjálfsögðu á að hamborgarinn hefði verið ofeldaðar. Hann brást við eins og allir veitingahúsaeigendur eiga að gera. Fór beint inní eldhús og las yfir kokknum. Ég geri ekki ráð fyrir öðru en að hann taki grænmetisábendingu líka vel, það getur varla verið stefna staðarins að spara svona rosalega í grænmetinu. Fyrir 1.395 krónur (og þá á eftir að borga fyrir drykk) vil ég fá eitthvað fyrir peninginn. Annars fer ég bara á besta hamborgarastað landsins og fæ mér beikonborgara með meira grænmeti og gos fyrir 990 krónur. Þar fylgir kokteilsósan líka frítt með, en kostar 95 krónur á Fabrikkunni.

Heilt yfir var ég mjög sáttur eftir þessa heimsókn og borgarinn smakkaðist afbragðs vel. Eins og ég sagði þá eru margir spennandi borgarar á matseðlinum og ég mun án vafa verða reglulega gestur á Hamborgarafabrikkunni.

Fyrir Ásgeir

Hámark kaldhæðninnar?

Þessar auglýsingar hanga nú uppi útúm allan bæ í strætóskýlum borgarinnar. Það er eitthvað svo innilega misheppnað við það að senda frá sér auglýsingu um nám sem hefur augljóslega ekki verið prófarkarlesin. (Smellið á myndina til að sjá hana í fullum gæðum)

Nema að þetta sé nám í ölskólanum? Eða kannski er auglýsingin listræn túlkun á þeim vinnubrögðum sem viðgengust hjá sumum verktökum við nýbyggingar síðustu ára? Maður spyr sig.

Miami halda áfram að drulla uppá bak

Horfði á fyrri hálfleikinn af viðureign Boston og Miami Heat í nótt. Hvílík skelfling. Miami voru gjörsamlega úti að skíta. Það verður reyndar að gefa Celtics það að þeir spiluðu ansi vel. En það var bara vont að horfa uppá Heat spila, þeir hittu EKKERT. Vonleysið skein úr andlitinu á D-Wade, greyið kallinn. Ég kíkti svo á highlights áðan á nba.com og ósköpin héldu bara áfram í seinni hálfleik, en Boston tóku 42-8 run! Ég held að ef að Miami taki sig ekki saman í andlitinu og vinni 3. leikinn (sem þeir eiga á heimavelli) þá sé þessi sería einfaldlega búin.

Sá ekki Suns – Portland, kíkti bara á highlights. Suns völtuðu einfaldlega yfir Portland í þessum leik og voru ekkert að láta fyrsta leikinn slá sig útaf laginu. Þegar Suns skora 120 stig (119 reyndar) þá held ég að Portland geti einfaldlega ekki haldið í við þá. Og þegar hinn 37 ára gamli Grant Hill skorar 20 stig og hittir úr 10/11 skotum, þá er voðinn vís fyrir andstæðinga Suns.

Tveir leikir í kvöld, Magic vs. Bobcats kl. 11, en vesturdeildin auðvitað alltof seint eins og vanalega, Dallas vs. Spurs kl. 01:30.

NBA og ég

Ég hef fylgst betur með NBA í ár en ég hef gert síðan örugglega 1998 eða þar um bil. Reyndar hefur áhugi minn einkum beinst að besta liðinu í deildinni, Houston Rockets, og flestir leikir sem ég hef séð hafa verið með þeim. Svo hefur maður kíkt á einn og einn með Cavs og Heat, því það er hrein unun að horfa á LeBron James og D-Wade spila körfubolta, þó það geti reyndar verið ansi frústerandi að horfa á Wade spila með þessum aumingjum sem eru með honum í liði. En LeBron er náttúrulega bara fáránlegur, og stundum held ég að hann trúi því varla sjálfur hvað honum tekst að töfra fram inná vellinum. Undrunarsvipurinn á honum eftir að hann þeytist í gegnum vörnina og tekur einhver fáránleg spin move og leggur hann svo í spjaldið öfugu megin miðað við hvaðan hann stökk upp, segir allt sem segja þarf. Eins og Keli orðaði það, “þetta er einsog í NBAlive þegar maður býr til kall sem er með 99 í fokking öllu! hann tekur eitt létt drippl og treður síðan yfir nokkra gaura einsog þeir séu þarna til skrauts.” LeBron tók einmitt til sinna ráða á móti Bulls í gær og kláraði leikinn. Þegar hann spilar eins og í gær er ekkert lið að fara að stoppa Cavs, og ef að þeir fara ekki alla leið í ár verður það ekkert annað en skandall, segi ég og skrifa.

Eins og ég sagði þá nær þekking mín á NBA liðunum ekki langt út fyrir Houston Rockets, en ég ætla svona til gamans, og aðallega fyrir sjálfan mig, að setja upp spá fyrir fyrstu umferð úrslitakeppninnar. Ég á engra hagsmuna að gæta í þessu þar sem ég held með Rockets, en ég hef sterkar taugar til James og félaga í Cavs, þeir verða mínir menn í ár. Byrjum á austrinu.

Austrið

Cavs (1) vs. Bulls (8) (Staðan er 2-0 fyrir Cavs)

Cavs voru langsamlega langbestir í vetur. James fáránlegur í nánast hverjum einasta leik og hinir og þessir minni spámenn stigu upp stundum (en spiluðu líka eins og aumingjar þess á milli). Shaq er í rosalegu formi, sérstaklega fyrir mann sem er 38 ára og 150 kíló. Hann er svo flottur á vellinum að það nær ekki nokkurri átt. Ég held að hann sé síðasti bitinn í púsluspilið sem vantaði í þetta Cavs lið, hann og Jamison. Raunar er hópurinn hjá Cavs orðinn svo breiður að þeir geta róterað mjög grimmt. Eins og ég segi, skandall ef þeir fara ekki alla leið. Athugið líka að í gær rúlla Cavs á 10 leikmönnum, meðan Bulls eru bara á 8. Cavs byrjuðu 3. leikhluta meira að segja með James á bekknum.

Bulls eiga enga möguleika. Þeir eru samt með flotta leikmenn, sérstaklega Rose, og og Noah er flottur í hösslinu, sem er einmitt eitthvað sem Cavs eru ekki nógu duglegir í. Shaq er of gamall til að standa í miklu hössli, og Ilgauskas kann ekki lengur að hoppa. Varejao getur reyndar unnið töluverða rusl vinnu, en í leiknum í gær voru Bulls að hamsa þá í baráttunni um lausa bolta. En hvað sem því líður þá var það James sem skoraði 40 stig (og 70% skotnýtingu!), tók 8 fráköst, gaf 8 stoðsendingar og blokkaði 2 skot. Bulls eiga einfaldlega ekkert svar við James. Cavs voru líka með 50% þriggja stiga nýtingu, 10 af 20. Bulls gera sitt besta og vinna kannski 2 leiki, en að lokum fer þetta 4-2 fyrir Cavs.

Magic (2) vs. Bobcats (7)

Magic er lið sem ég skil ekki alveg. Þeirri besti leikmaður, er einnig ofmetnasti leikmaður deildarinnar, Dwight Howard. Þú getur fengið rosalega leiki frá honum, þar sem hann rífur niður 20 fráköst, blokkar 5 skot og skorar 15-20 stig. En svo færðu leiki eins og fyrsta leikinn á móti Bobcats þar sem hann skorar 5 stig og tekur 7 fráköst. Að vísu blokkaði hann 9 skot sem er helvítis hellingur, en hann var non factor sóknarmegin. Það er líka merkilegt hvað hann er léleg vítaskytta, miðað við hvað hann getur hitt sitjandi á bekknum eða út við miðju, í upphitun nota bene. Ég held að það sem Howard skorti sé almennilegur þjálfari. Ewing hefur verið að reyna að kenna honum, en hver var það sem skólaði Ewing til í úrslitarimmunni 94? Jú, Hakeem Olajuwon. Til að búa til alvöru center, þarftu að fá alvöru center til að þjálfa hann, ekki einhvern second class nobody sem vann aldrei meistaratitil. Howard á líka í vandræðum með villur og var heppinn að fá ekki 6. villuna á móti Bobcats, hefði réttilega átt að fá hana fyrir að lemja Wallace í hausinn. Svo fékk hann líka einhverjar 16 tæknivillur í vetur, sem er fáránlegt. Eins og ég segi, það þarf einhver að skóla strákinn til, Ewing er augljóslega ekki starfi sínu vaxinn!

Annar vafasamur leikmaður í Magic er Vince Carter, sem var einu sinni geðveikur leikmaður sem ógnaði mjög og gat troðið í smettið á öllum, en er núna burnout sem þorir ekki að drive en leitar í staðinn að skotum sem hann kann varla að hitta úr (4-19 á móti Bobcats).

Bobcats er svo sem ekki sterkasta liðið, en þeir eru með tvo mjög flotta leikmenn, Wallace og Jackson, og á góðum degi geta þeir hleypt þessari rimmu uppí eitthvað sprell, en ég hallast að Magic sigri, 4-3.

Hawks (3) vs. Bucks (6)

Scott Skiles er þjálfari ársins að mínu mati, reiknaði einhver með því að Bucks myndi enda í 6. sæti fyrir þetta tímabil? Annars held ég að sigurgöngu þeirra ljúki núna. Hawks eru ekki besta liðið í NBA, en þeir eru betri en Bucks. Bogut er líka úti það sem eftir lifir tímabils, og Jennings er bara ekki jafn góður og menn voru að vona í upphafi tímabils. Hann er líka ekki nógu góður í að finna samherja sína (ég meina, 34 stig, en bara 2 stoðsendingar er afleitur árangur hjá leikstjórnanda).

Hawks taka þetta, 4-2.

Boston (4) vs. Heat (5)

Boston er nú meira liðið. 3 “bestu” leikmennirnir eru allir á hraðri leið á elliheimili, og einn þeirra tók líka uppá því að fara í bann fyrir slagsmál! (Kannski til að fá smá hvíld?) Rondo heldur þessu liði á floti, og gömlu mennirnir pitcha smá inn þegar þeim endist þol til. Rasheed Wallace er líka fáránlegt ólíkindatól, sem nennir ekki lengur að spila körfubolta og vill  bara fá launaseðilinn sinn. En hvað sem öllu þessu líður þá er Heat skelfilegt lið og athugið að þetta er liðið sem vann titilinn 2006! Síðan þá hefur mikið vatn runnið til sjávar. Það er enginn góður í liðinu nema Wade (sem er samt geðveikur), O’Neal er á svo háum samningi að það er ekki hægt að signa neina aðra, Beasley er mjög óstabíll, basically er ekkert varið í þetta lið nema Wade, og þegar hann er ekki í stuði tapar liðið. Samherjar hans vita EKKERT hvað þeir eiga að gera ef hann finnur sig ekki.

Persónulega vona ég innilega að Heat taki þetta, en ég held að það sé ekki séns í helvíti. Ég spái þessu 4-1 fyrir Boston, 4-2 ef að Heat taka leikinn í nótt þar sem KG er í banni.

Vestrið

Lakers (1) vs. OKC (8)

Fyrir þetta tímabil gerði ég mér engar væntingar um árangur Rockets. Yao og T-Mac báðir meiddir, þannig að örlögin voru í höndum kjúklinganna. Já og svo má ekki gleyma að liðið spilaði með starting center sem er 6’6! En Adelman náði að kreysta ótrúlegan árangur útúr þessu liði, og oft á tíðum ótrúlegan karakter. Fyrir tímabilið hefði ég verið mjög sáttur með 50% árangur, en eftir á að hyggja er ég eiginlega örlítið svekktur að liðið hafi ekki náð í úrslitakeppnina og þá væri ég núna að skrifa um Lakers vs. Rockets, en ekki Oklahoma City Thunder.

Þessi sería er nánast örugg Lakers í hag, þó svo að Kobe sé farinn að eldast, þá á hann ennþá töluvert eftir á tanknum. OKC eiga ekkert í hann, og svo er Gasol líka stöðug ógnun, og það er heldur ekkert þægilegt að dekka Bynum. Svo hafa Lakers líka Artest sem er sóðalega góður varnarmaður þegar hann nennir því, og í fyrsta leiknum náði hann að loka vel á Durant. Ef að Durant skorar ekki 30+ stig eru OKC í vanda. Ég tel engar líkur á upsetti í þessari seríu, og Lakers taka þetta 4-2. Jafnvel 4-0 ef þeir bara nenna því, sem ég held að þeir geri ekki.

Dallas (2) vs. Spurs (7)

Hvað eiga þessi tvö lið sameiginlegt? Jú það eru gamlir kallar í aðalhlutverkum í þeim báðum. Stabílasti leikmaður áratugarins, Tim Duncan, er alveg að klára tankinn sinn. Að vísu er Manu búinn að vera í rosa stuði hjá Spurs, meðan að Parker hefur valdið vonbrigðum. Nowitzki og Kidd eru á síðustu metrunum hjá Dallas en hafa þó báðir verið djöfull sprækir á tímabilinu. Dirk hefur verið sjóðandi heitur, og þó að hann taki ekki mörg fráköst, þá skorar hann 20+ í hverjum einasta leik. Hann var með 12 af 14 í síðasta leik, og 12-12 í vítum! (Hann hefur ekki klikkað úr víti síðan 29. mars og þá skaut hann 16/17!). Ég er að renna svolítið blint í sjóinn með þessa seríu, en ég segi Dallas 4-3, eftir hetjulega baráttu frá Manu og Duncan.

Suns (3) vs. Portland (6)

Fyrirfram sennilega sú sería sem flestir reiknuðu með að væri auðveldast að spá fyrir um. Suns fóru inní keppnina með 3 sigra á bakinu, meðan að Portland eru að spila án síns besta manns, Brandon Roy. En Portland tókst að girða í brók í fyrsta leik og unnu 5 stiga sigur. Ég sá ekki leikinn svo ég veit ekki hvernig á að útskýra þetta. Kæruleysi hjá Suns vs. brjáluð baráttu hjá Portland? Annað hvort stefnir í huge upset í þessari seríu, eða að Suns bíta í skjaldarrendur í næsta leik og taka þetta 4-2. Ég þori ekki að spá um á hvorn veginn það fer.

Denver (4) – Utah (5)

Utah jöfnuðu í nótt, believe that or not! Fyrirfram hefði ég reiknað með nokkuð þægilegum sigri hjá Denver í þessari rimmu, en kannski gerðu þeir það líka? Ég held samt að þeir klári þetta, 4-2 fyrir Denver.

Þar hafið þið það! Öll input um þessa fagmannlega unnu spá eru hjartanlega velkomin.